یاسین – برفانی تودے کی زد میں آکر ایک ھی خاندان کے چار افراد ہلاک، تین زخمی

گلگت(صفدرعلی صفدرسے) ضلع غذر میں گزشتہ اڑتالیس گھنٹوں سے جاری بارشوں او ر پہاڑوں پر ہونے والی برفباری نے تباہی مچادی، تحصیل یاسین کے نواحی گاﺅں قرقلتی میں برفانی تودے زد میں آکر ایک ہی خاندان کے چار افراد جاں بحق ہوگئے ۔ جاں بحق ہونے والوں میں تین خواتین اور ایک مرد شامل ہے ۔ بارشوں کے نتیجے میں غذر گلگت ، غذر چترال اور گاہکوچ اشکومن روڈ دس سے زائد مقامات پر بلاک ہوگئی ہے ۔تفصیلات کے مطابق اتوار کی شام سے شروع ہونے والی بارش اڑتالیس گھنٹے گزرنے کے بعد بھی جاری رہی میدانی علاقوں میں موسلہ دھار بارش اور پہاڑوں پر برفباری کے نتیجے میں نظام زندگی درہم برہم ہوکر رہ گئی ہے ۔ تحصیل یاسین کے نواحی گاﺅں قرقلتی میں سوموار اور منگل کی رات گئے آنے والے برفانی تودے میں دب کر ایک ہی خاندان کے چار افراد جاں بحق ہوگئے ۔ جاں بحق ہونے والوں میں 32 سالہ ٹکا خان، اسکی تین سالہ بیٹی کریمہ، 30 سالہ بیوی اور 60 سالہ والدہ موقع پر ہی جاں بحق ہوگئیں جبکہ تین افراد بلاور خان ولد حاجی خان ، الطاف ولد بلاور خان اور نادیہ ولد ٹکا خان شدید ز خمی ہوگئے ۔اطلاع ملتے ہی اے سی گوپس یاسین شجاع عالم پولیس نفری اور فوکس کی ریسکیوٹیم کے ہمراہ متاثرہ گاﺅں روانہ ہوئے ۔خراب موسم اور سڑکوں کی بندش کے وجہ سے ریسکیوٹیم کو متاثرہ علاقے تک پہنچنے میں سخت مشکلات کا سامنا کرنا پڑا۔